El hadj houcine toulali - Cham3a

**الشمعة**

اللازمة
لله يا الشمعة سالتك ردي لي سآلي
ردي لي سآلي
وش بيك فالليالي تبكي مدى انت اشعيلا
*****
علاش يا الشمعة تبكي ما طالت الليالي
وش بيك يالي تتهيء لبكاك فكل ليالي
وعلاش كتباتي طول الديجان كتلالي
وش بيك يالي وليتي من ذا البكا عليلا
علاش كتساهر داجك ما سهرو نجالي
وش بيك يا لي ما رينا لك فلبكا امثيلا
وعلاش باكيا روعتي ناس لهوى امثالي
وش بيك يا لي تنصرفي بدموعك الهطيلا
وعلاش باكيا مدالك للباكي وسالي
وشبيك يالي ظاهر حالك حالتى نحيلا
ويلا نشوف لصفرارك يصفارلو خيالي
ويلا نشوف لدبلتك زادت خاطري دبيلة
*******
لله يا الشمعة سالتك ردي لي سآلي
ردي لي سآلي
وش بيك فالليالي تبكي مدى انت اشعيلا
*******

سلتك بالله عيد لي اش جرالك
وعلاش باكية مدا لك
وش تكون قصتك وش انهو داك
اش نهو داك باش رق خيالك
وكسا قامتك حنحالك
وتبات باكيا لحبابك وعداك
لي دون خفا اشكي بما فدخالك
وحكي قصتك نصغى لك
وانا قصيتي بها نتعداك
لو جيت يا الشمعة نحكي لك كل ما اجرى لي اوعدي
تنسى غرايبك وتسمعي لغرايبي طويلا
ويلا باكيا من نارك نيران في ادخالي
عدات كل نار فداتي وجوارحي عليلا
ويلا باكيا بفراقك مفروق عن اوصالي
وعلى الفراق صابر وش صبرني علالعقيلا
ويلا باكيا باسقامك شوفي اسقام حالي
من قيس وارثو بعد فناه اسقام حب ليلى
وانت منين داك حكي لي اللولي وتالي
ما فارقة خليل بحالي ما فارقة خليلا
تقول باكيا عند خيام السمر والرمالي
ولا على بطاح وما دار على خيام ليلى
ولا على فراق الي عشقو فحيها بحالي
عربان آمنوابالمختاروشحال من قبيلا
*******
لله يا الشمعة سالتك ردي لي سآلي
ردي لي سآلي
وش بيك فالليالي تبكي مدى انت اشعيلا
*******
سللتك لله عيد لي ما اصابك
وشكون سبتك فمصابك
لي احكي خطابك وانا نصغاك
يستغرب من لا تحدثو بخطابك
الغريم فاللغا يسطابك
ويجول في حديثك وجواب لغاك
لو كنت ذات شاكية بعذابك
وعماو الدموع اهذابك
لو كان اللي كفاك تصرخي بلغاك
اسيدي بلسان حالها قالت ليا ما اخفاك حالي
. يكفاك يا السايل حالي عن حالتي نحيلا
في صولة العمالة كنت وكانوا لي رجالي
قبايل لجناح لا تحكي كيفها قبيلا
يشيدو بروج من لعمالة كل برج مالي
ويعمروا جباح من مواهب ربنا جزيلا
فيهوم كيحجبو كيف الملوك فالليالي
وايام الربيع يخرجوا للبطايح الحفيلة
طلاب جاو ا ليا هزمو بالحامية ابطالي
تركو عمالتي بعد العز فحالها ذليلا
وليت للعصارة شهدي صفاوا من امصالي
صابوه قوت ودوا للذات الفانية العليللا
ومن المصال صفاو شماعي يا لي صغا لي
وحكايتي للقدام سيرة باقيا طويلا
***************
لله يا الشمعة سالتك ردي لي سآلي
ردي لي سآلي
وش بيك فالليالي تبكي مدى انت اشعيلا
*******
اسايلني يتدبروا فمسالك
تركوا حشايبي هالك
لو كان من الهند قوامي تهلاك
داروني فسخوت زي ما يبدا لك
تبغي فقلبها عذالك
يتختوا حتى يستولاو بلاك
وعلفتيل لفو توراقي يا لي صغا لي
وبلا هوا النهبة شعلوا فمواسطي فتيلا
ننشي سهو نطرا في ننشيها بلا عوالي
ونلوحها على الحسكة قطرة صافية شليلا
نتفكر لعمالة ويزيد افراقها نكالي
. نتفكر القصارة وتعود قلايدي هليلا
نتفكر العصارة وهجير الشاردة قبالي
ونقول واجب بكاي على ما صار لي اقبيلا
يحق لي بكاي على الغربة ما جبرت والي
فيا مسامحين حبابي وسلامتي قليلا
شحال من عذاب جرى ليا كيف ما نبالي
يا شوم ليعتي وبلايا صدفت كل حيلا

شحال من هلاك جرى ليا من الشعيل تالي
هذا عشور فالواقع بيا غاية الوسيلا
*******
لله يا الشمعة سالتك ردي لي سآلي
ردي لي سآلي
وش بيك فالليالي تبكي مدى انت اشعيلا
*******
سال اهل الحضرة اذا فرقت ابطالك
قبايل الجناح رجالك
راكي مع ارجالن يزهاو معاك
فلغاهم يدركو بما يزها لك
وعلى السرور نادى فالك
وديار كيراعيوا بما يرعاك

بيك يسهر فكل داج الحالك
واذا ينصرف مشعالك

تدعي بالفراق ويقبال دعاك

تبات يا الشمعة تبكي وانت فشان عالي
وجدوك يا الشمعة فمجالس رايقة حفيلا
وتبات يا الشمعة ترتي فضريح كل والي
وفشحال من مقام يشعلوك اهل الوسيلة
وتبات يا الشمعة بين اهل المال والموالي
وعليك كيصرفو الاموال الطايقة الثقيلا

وتبات يا الشمعة فمساجد ربنا العالي
وعليك كيخرجو السلكات فليلة الفضيلة
وتبات يا الشمعةبين اهل الشرح والامثالي
وعليك تنشرح كتوب بازغة جميلا
وتبات يا الشمعةبين العشاق ولغوالي
وعليك كيشاهد الخليل محاسن لخليلة
نبغيك با الشمعة تبكي في الحرة الليالي
وانا على ذنوبي نبكي فمقام دار ليلى
*******
لله يا الشمعة سالتك ردي لي سآلي
ردي لي سآلي
وش بيك فالليالي تبكي مدى انت اشعيلا
*******
ذكرني يا حبر اللغا بشعارك
لي يخبروا بخبارك

يدريو من يكون سواي وسواك

ناري نحكيها لكم لعشور فنارك
وسرارها تجي لسرارك

قصة من قصايص عشقك وهواك

فاش يجيوا يقلبو دينارك
من خالص الذهب عيارك

يخفى على الذي ما داواه دواك


شحال قلت لها من قوم يطالبو جدالي
وشحال من جحود من جدالي باقيا جديلا
شحال من عقود عليهم تذكار من لآلي
مشهودة عليهم بمعاني رايقة نبيلا
واذا نتبع عداي بعد الهروب من قوالي
نيشاني يلحقهم وصوارمي ثقيلا
غابوا اهل الهوى واضحىسوقي منهم خالي
ولاو بيه يدعيوا من لا لهم بيه صيلا
الصمت خير لي من قومان سكاتها اولى لي
من لا بفايدة فادوني المعارف الرديلا
لو كان قاصهوم هواي يستحسنوا قوالي
تسلم قلوبهم بالسنة والفرض والنفيلا
وسلام ربنا للودبة ما فاحت لغوالي
بالورد والزهر ونسري ونسايمو وسيلا
واسمي نبينو ما يخفى موضوح في ازجالي
محمد الشريف بن علي ولد الرزين صيلا
*******
لله يا الشمعة سالتك ردي لي سآلي
ردي لي سآلي
وش بيك فالليالي تبكي مدى انت اشعيلا
*******